التحضير لإمتحانات الدور الثاني للسادس الاعدادي
امتحانات الدور الثاني مو نهاية العالم، هي فرصة جديدة لكل طالب ما حالفه الحظ بالدور الأول عندة فرصة يعوضة بالدور الثاني صح هواي طلاب يشوفوها شي مزعج أو صعب، بس هي بالحقيقة تكدر تكون بداية لنجاحك وتحقيق حلمك. النجاح والمعدل العالي بالدور الثاني مو مستحيل، بس يحتاج منك ترتيب للأمور وخطة تمشي عليها. بهذا المقال راح نساعدك شلون تتحضر صح لهاي الامتحانات.
1. اعرف شنو سبب رسوبك
أول شي لازم تسويه هو تكعد وية نفسك وتعرف ليش رسبت بالدور الأول. هل جان السبب قلة دراسة؟ لو ما فهمت المادة بشكل جيد؟ لو المراجعة جانت قليلة؟ يمكن جان عندك ضغط نفسي أو ظروف معينة. من تعرف السبب راح تكدر تتجنبه وما تكرر نفس الغلط في الدور الثاني. بدون ما تعرف وتواجه السبب ممكن تغلط نفس الغلطة وترسب مرة ثانية.2. سوي جدول دراسة واقعي
الوقت قبل الامتحانات ثمين جداً لذلك لازم تسويلك جدول دراسة يومي ومرتب وتبدي بالدراسة بعد اخذ استراحة يومين او ثلاثة بعد امتحانات الدور الاول. انطي وقت أكثر للمواد الصعبة أو المواد المعقدة الي اساسك بيها ضعيف، مو لازم تدرس هواي مواد بنفس اليوم مادتين أو تلاثة كلش كافي. او تكدر تقرا باليوم مادة وحدة وترتب جدولك على هذا الاساس مثلا الرياضيات 5 ايام بس تقرا بيهن هذا المادة، المهم تاخذ استراحات قصيرة بين وقت والثاني حتى ما تتعب وعقلك يركز أكثر. وقبل الامتحان بأسبوع حاول تخلي هذا الوقت للمراجعة الشاملة لكل مادة.3. ركز على الملزمة والأسئلة الوزارية للسنوات السابقة
من الأخطاء الكبيرة إنك تحاول تدرس من اسئلة اثرائية او مصادر وملازم هواي وتضيع وقتك. بالدور الثاني الأفضل تركز على الملزمة اللي درست عليها قبل بالدور الاول او الشي الي درست عليها طول السنة بدون تغير المصدر الي اعتمدت عليه وخصوصاً المخصصة للأسئلة الوزارية. ابدأ بحل الأسئلة الوزارية للسنوات السابقة وخصوصاً آخر 5 سنوات وركز على الأسئلة المكررة او اسئلة الفصول. حاول تختبر نفسك وتكتب الإجابة مثل ما تكون بالامتحان الحقيقي حتى تتعود وتصير عندك ثقة بنفسك.4. قلل التلفون ومواقع التواصل
الوقت قصير وأي دقيقة تضيعها راح تندم عليها بعدين. حاول تبتعد عن التلفون ومواقع التواصل الاجتماعي شكد ما تكدر لأنها تشتت ذهنك وتفقد التركيز واهم شي ابتعد عن المقاطع القصيرة مثل التيك التوك والريلز لانها تقلل من انتباهك وتفقد قوة تركيزك وتسوي شي عندك ما يسمى ب "تعفن الدماغ". حددلك وقت قليل باليوم تستخدم فيه التلفون مثلاً ساعة وحدة والباقي كله تفرغه للدراسة والراحة.5. نام زين واهتم بصحتك
الصحة الجيدة تخليك تركز أكثر. لذلك لا تهمل نومك اقل شي نام 6 إلى 8 ساعات بالليل. واكل اكل صحي وابتعد عن الأكل السريع واشرب ماي هواي. اضافة لا تكثر من القهوة والمشروبات المنبهة لأنها بشكل كبير لان راح تتعب جسمك وعقلك بدل ما تفيدك.6. جرب طرق مراجعة مختلفة
مو كل الطلاب يتعلمون بنفس الطريقة لذلك جرب طرق مختلفة بالمراجعة. مثلاً ارسم شكل بسيط يوضح أفكار الفصل او سوي مخططات وخرائط ذهنية لتسهيل الحفظ او اكتب الأسئلة والأجوبة على بطاقات صغيرة. أو تكدر تسجل شرحك بصوتك وتسمعه وأنت مرتاح. هاي الطرق تساعدك تحفظ وتفهم المادة بشكل أسرع.7. ثق بنفسك ولا تيأس
هواي طلاب رسبوا بالدور الأول بس بالدور الثاني شدوا حيلهم وحققوا درجات عالية ودخلوا كليات زينة مثل الطب والهندسة. لا تخلي اليأس يسيطر عليك خليك واثق من نفسك واعتبر هذا الدور هو التحدي الك حتى تثبت نفسك.بالنهاية... امتحانات الدور الثاني مو نهاية الطريق هي فرصة حقيقية الك. كل دقيقة تدرسها هسه ممكن تغير مستقبلك. لا تفكر باللي فات وابدأ من اليوم. بالترتيب والثقة راح تكدر تتجاوز هذا التحدي وتنجح وتوصل للي تريده.